АКАФИСТ святым царственным страстотерпцем императору Николаю II и его семье - АКАФИСТЫ - Каталог статей - ДОБРЫЙ САЙТ


                                                                           

  Photo Flipbook Slideshow Maker  


ДОБРЫЙ  САЙТ 

МЕНЮ САЙТА
 
Наш опрос
Оцените мой сайт
Всего ответов: 758
 
ФОТОГРАФИИ
 
Статистика

Онлайн всего: 1
Гостей: 1
Пользователей: 0
 
Главная » Статьи » АКАФИСТЫ

АКАФИСТ святым царственным страстотерпцем императору Николаю II и его семье

АКАФИСТ святым царственным страстотерпцем императору Николаю II и его семье


 


Кондак 1
Избраннии и всехвальнии царственнии страстотерпцы, державы Российския заступницы и о людех ея молитвенницы святии, благоверный царю Николае с царицею Александрою и царственными чады Алексием, Ольгою, Татианою, Мариею и Анастасиею, похвальное пение приносим вам с верою и любовию; вы же, яко имущии дерзновение к прославльшему вас Господу, ограждайте нас от всяких зол и бед молитвами вашими, да зовем вам:
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Икос 1
Ангелов Творец и всея твари Царь и Господь, судьбы народов и царств по воли Своей управляяй, воздвиже в стране Российстей род царей благочестивых и избра тя, царю Николае с семейством твоим в жертву живую, всеусердную и благоприятную Богу. Мы же, дивящеся таковому о вас Божию смотрению, во умилении сердец приносим вам похвалы сия:
Радуйся, помазанниче Божий Николае, престола царства Российскаго украшение.
Pадуйся, царице Александро, мудрых жен христианских красото и славо.
Радуйся, царевичу Алексие, жертво непорочная, Богу принесенная.
Pадуйтеся, истинныя невесты Христовы и страдалицы Ольго, Татиано, Марие и Анастасие.
Радуйтеся, всем сердцем Спаса Христа возлюбившии.
Pадуйтеся, верность Ему даже до смерти сохранившии.
Радуйтеся, скорби многая в житии вашем претерпевшии.
Pадуйтеся, страстем Христовым мужественно подражавшии.
Радуйтеся, на Небеси и на земли от Господа прославленнии.
Pадуйтеся, к сонму святых новомучеников и исповедников Российских сопричтеннии.
Радуйтеся, страны Россииския милостивии покровители.
Pадуйтеся, фимиам молитв за нас к Богу приносящии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 2
Видев сердцеведец Господь твердое твое желание верою и правдою послужити Богу и народу своему, благоизволи помазати тя, богоизбранный царю Николае, на царство Российское; ты же приял еси венец царский яко послушание, Богом данное, и многая труды подъял еси ради могущества и славы державы Российския, воспевая Давшему ти благодать и силу песнь ангельскую: Аллилуиа.

Икос 2
Разумом светлым и сердцем чистым изволению Божию повинуяся, иго благое Христово взем, бразды правления державы Российския приял еси, царю Николае, такожде поревновал еси храмов и обителей иноческих созиданию, святых угодников Божиих прославлению и Православныя Церкве утверждению. Сего ради, ревность твою в служении сем прославляюще, зовем ти таковая:
Радуйся, от юности сердце свое Господеви предавый.
Pадуйся, помазанниче, Богом избранный.
Радуйся, скипетр царский достойно носивый.
Pадуйся, царское служение со страхом Божиим совершавый.
Радуйся, могущество и славу державы Российския утвердивый.
Pадуйся, насадителю в ней истиннаго просвещения и благочестия.
Радуйся, о благе народа усердное попечение имевый.
Paдуйся, и ныне о всех нуждающихся пред Господем предстателю.
Радуйся, храмы и обители иноческия земли Российския украсивый.
Pадуйся, Церкве Святыя Православныя верный защитниче.
Радуйся, душу свою за люди Российския и Отечество наше положивый.
Pадуйся, венцем от Царя Славы венчанный.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 3
Силою свыше укрепляемь, мужественно проходил еси предлежащий ти подвиг служения Богу, Отечеству, народу своему, и всем православным народом заступник явился еси, егда подвигл еси воинство русское на спасение страны Сербския и на брань противу врагов России и веры Православныя. Темже благодарственно воспеваем укрепившему тя Христу Богу: Аллилуиа.

Икос 3
Имея в сердце твоем твердое упование на всесильную помощь Божию и пламенное желание державе Российстей послужити, глаголал еси, страстотерпче святый: несть тоя жертвы, юже не принесл бых во благо Отечества моего. Тако научи и нас за спасение страны нашея души полагати, заповедь любве исполняюще, воспевающе тебе, святый царю Николае, похвалы сия:
Радуйся, веры Православныя велий ревнителю.
Pадуйся, закона и правды твердый хранителю.
Радуйся, милостивый и кроткий повелителю.
Pадуйся, царей и князей Российских украшение.
Радуйся, стране своей возлюбленней добре послуживый.
Pадуйся, ходатаю о ней усердный.
Радуйся, лукавыя советы врагов России презревый.
Pадуйся, во дни брани мужество велие явивый.
Радуйся, всея России Богом данный заступниче.
Pадуйся, стран и народов православных державный покровителю.
Радуйся, яко Престолу Святыя Троицы ныне предстоиши.
Pадуйся, яко со всеми святыми пред Богом о душах наших ходатайствуеши.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 4

Бурю лютых искушений воздвиже отец лжи диавол на страну нашу православную, злобою, клеветою и коварством беззаконных и богоотступников собирая, дабы разорити и погубити царство Российское. Ты же, благоверный царю Николае, братоубийства в державе своей избегнути хотя, власть земную и славу оставил еси, и умолял еси Господа, да сохранит на Руси верных Богу и поющих Ему: Аллилуиа.

Икос 4
Слыша и видя Отечества твоего нестроение и разорение, молился еси, святый царю Николае, да спасет Пречистая Мати Господа дом Свой — державу Российскую, и се явися образ Пресвятыя Богородицы Державныя, и прият Царица Небесная скипетр и державу от руку отверженнаго народом царя земнаго. И бысть явление иконы сея на велию радость всем верным, поющим тебе, страстотерпче святый:
Радуйся, волю свою всецело в волю Божию предавый.
Pадуйся, тленную славу земную ни во чтоже вменивый.
Радуйся, царский венец на терновый пременивый.
Pадуйся, терпению Христову верный подражателю.
Радуйся, хулы и напасти кротко претерпевый.
Pадуйся, якоже Иов многострадальный, праведность во страдании явивый.
Радуйся, покрову и заступлению Божия Матере страну Российскую вручивый.
Pадуйся, пламенныя молитвы к Богу о ней возносивый.
Радуйся, Богом на страдание вольное предызбранный.
Pадуйся, царскую порфиру кровию своею обагривый.
Радуйся, веру истинную до конца сохранивый.
Pадуйся, царственною славою на Небеси и на земли почтенный.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 5
Боготечная звезда явилася еси, славная царице Александро, приявши веру Православную и всем сердцем твоим возлюбивши молитву, храмы Божия и святых отец творения. Темже во благочестии воспитала еси чада твоя и уготовала еси их в жертву чистую, непорочную за Христа, воспевающи Ему благодарственную песнь: Аллилуиа.

Икос 5
Видя Господь крепость веры твоея и силу терпения, святая царице Александро, дарова тебе вкупе с возлюбленным супругом твоим и чады вашими чашу горьких страданий испити и мученическую смерть прияти. Ты же, подражающи закланному Агнцу Христу, вся претерпела еси и во обители горния душею возлетела еси. Темже, поминающе страдания твоя, Христова страстотерпице, воспеваем тебе таковая:
Радуйся, в сиротстве твоем Материю Божиею восприятая.
Pадуйся, Феодоровскому образу Владычицы посвященная.
Радуйся, любовию к мудрости Богом одаренная.
Pадуйся, святынь православных почитательнице.
Радуйся, с супругом твоим в любви и благочестии пожившая.
Pадуйся, чадом твоим царственным мати любвеобильная.
Радуйся, ратником увечным страдания облегчавшая.
Pадуйся, Умывшему ноги учеником добре подражавшая.
Радуйся, матерей российских в скорбех утешающая.
Pадуйся, всем российским женам похвало и радосте.
Радуйся, елей милости в сосуде своем собравшая.
Pадуйся, верность Отечеству новому и вере православней даже до смерти сохранившая.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 6

Проповедницы славы Божия и ревнители благочестия явистеся, святии царственнии супрузи Николае и Александро, и образ брака благословеннаго, союзом любве связаннаго показасте верным людем и всем чтущым вас и благодарно воспевающым прославльшему вас Богу: Аллилуиа.

Икос 6
Возсияли есте, яко звезды богосветлии, в царстве Православно-Российстем, боговенчаннии царю Николае и царице Александро, в житии вашем и в делех любве, милосердия, веры; вы бо воспитали есте чад своих во благочестии, с нимиже в заточении от богоборцев бывше, веру, надежду и любовь к Богу сохранили есте, и мученическую кончину претерпевше, причастницы Царствия Небеснаго соделастеся. Темже, яко земли Русския покровителие, молите Бога о спасении Отечества нашего и всех с любовию вас чтущих и воспевающих тако:
Радуйтеся, образ истинный супружества христианскаго явившии.
Pадуйтеся, любовь небесную в себе поистинне показавшии.
Радуйтеся, бедных и убозих милостивии попечители.
Pадуйтеся, христианским смирением украшеннии.
Радуйтеся, изгнани правды ради, яко ваше есть Царство Божие.
Pадуйтеся, яко мзда ваша многа есть на Небесех.
Радуйтеся, путь узкий и прискорбный прошедшии.
Pадуйтеся, блаженство райское унаследившии.
Радуйтеся, яко ангели с вами ликуют на небеси.
Pадуйтеся, яко человецы восхваляют вас на земли.
Радуйтеся, от людей Российских с любовию прославляемии.
Pадуйтеся, с Господем и Пречистою Его Материю вечно царствующии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 7
Хотя Человеколюбец Господь радость явити людем российским, дарова нам светлаго отрока царевича Алексиа, дивнаго молитвенника и заступника нашего. Той бо во смирении сердца глагола: «Аще бы мне царствовати, да не обрящутся нищии и убозии». Егда же многая скорби, недуги и убиение от богоборцев претерпев, в Царство Небесное взыде страстотерпец святый, тамо прославльшему его Господу радостно воспе ангельскую песнь: Аллилуиа.

Икос 7
Новое знамение благоволения Своего к державе Российстей яви тя Господь, царевичу Алексие, яко плод благословен молитв Саровскаго чудотворца, надежду, славу и упование православных людей всея России. Божиим же промышлением, яко агнец непорочный, мученическую кончину от безбожных приял еси, ныне же ликуеши яко наследник Царствия Небеснаго. Сего ради победным венцем украшеннаго и с лики новомучеников и исповедников Российских прославленнаго, ублажаем тя, глаголюще:
Радуйся, преподобному Алексию, человеку Божию, тезоименитый.
Pадуйся, святых князей-отроков российских сонаследниче.
Радуйся, достойный сыне родителей благочестивых.
Pадуйся, юнейший ратник в воинстве отца твоего бывый.
Радуйся, образе кротости и смирения.
Pадуйся, земли нашея украшение.
Радуйся, болезнь тяжкую мужественно претерпевый.
Pадуйся, за вся Господа благодаривый.
Радуйся, яко овча на заколение приведенный.
Pадуйся, жертво непорочная, Богу во всесожжение принесенная.
Радуйся, детскую чистоту житием своим явивый.
Pадуйся, вместо царства земнаго Царство Небесное приемый.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 8
Страннo есть людем христолюбивым видети, како странствие земное совершивши и путь страдальческий прошедши, дщи царева, равноапостольней Ользе тезоименитая, веры ради мужественно на смерть себе вдаде за Христа, Владыку Жизни. Сего ради, мученический венец приявши, страстотерпице святая Ольго, со ангелы Престолу Христа Бога предстоиши, поющи Ему победную песнь: Аллилуиа.

Икос 8
Вси Небеснии чини и святых земли российския собори радостно прияша вас, страстотерпцы царственнии, подвиг земнаго жития своего совершившии и в жизнь вечную вшедшии. Темже вся Церковь Христова, восхваляющи любовь вашу и служение во славу Господа и Пречистыя Его Матере, мира Заступницы, молитвенно память вашу празднует и песни хвалебныя приносит вам:
Радуйтеся, добродетелем святых предков ваших подражавшии.
Pадуйтеся, народу своему верно послужившии.
Радуйтеся, вдов и сирот питатели и заступницы.
Pадуйтеся, милости и сострадания к людем преисполненнии.
Радуйтеся, христианскаго благочестия поборницы.
Pадуйтеся, крест свой с терпением и всецелым преданием в волю Божию понесшии.
Радуйтеся, изгнание и поругание смиренно претерпевшии.
Pадуйтеся, силою Божиею на подвиг страдальческий укрепленнии.
Радуйтеся, за веру и любовь ко Отечеству своему безчестие приявшии.
Pадуйтеся, в скорбех и злостраданиих мужество духовное показавшии.
Радуйтеся, теплотою любве вашея нас согревающии.
Pадуйтеся, друг друга тяготы носити нас научающии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 9
Всякое естество ангельское удивися терпению и мужеству твоему, страстотерпице святая Татиано, ты бо, всяких добродетелей исполнена и покровительнице своей, святей мученице Татиане, подражающи, с молитвою предала еси дух твой в руце Божии и в Царство Небесное возшла еси, идеже со ангелы и всеми святыми воспеваеши Богу песнь: Аллилуиа.

Икос 9
Ветии многовещаннии не возмогут по достоянию воспети пречудное прославление ваше, страстотерпцы царственнии. Исполни бо ся проречение преподобнаго Серафима Саровскаго, яко прославльшаго его царя прославит Бог. Мы же, исполненнии радости и благодарения Господу, торжествующе память вашу, от всего сердца взываем сице:
Радуйтеся, вся печали ваша на Бога возложившии.
Pадуйтеся, заповедь любве до конца исполнившии.
Радуйтеся, страдальческий подвиг славно скончавшии.
Pадуйтеся, от рук ненавидящих вас смерть без ропота приявшии.
Радуйтеся, Христа Бога в сердцах своих носившии.
Pадуйтеся, вечнаго Царства Христова наследницы.
Радуйтеся, смертию временней прешедшии к жизни вечней.
Pадуйтеся, Церковию Православною чудно прославленнии.
Радуйтеся, в радость Господа своего вшедшии.
Pадуйтеся, венцы нетления от Него приявшии.
Радуйтеся, яко страдания ваша в храмех Божиих величаются.
Pадуйтеся, яко память ваша с похвалами во Святей Церкве совершается.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 10
Спасти хотящи душу свою, святая страстотерпице царевно Марие, яко агница Божия к смерти себе приуготовила еси, покаянием теплым душу очистила еси и приобщением Тела и Крови Господни соединилася еси Царю Славы Христу, воспевающи Ему, всем страдальцем царственным дарующему жизнь вечную, победную песнь: Аллилуиа.

Икос 10
Стену необоримую и покров дарова Господь всей державе Российстей, благоприятными бо вашими молитвами, страстотерпцы царственнии, спасаете Отчизну вашу земную от всех врагов видимых и невидимых. Сего ради благодарение Отцу Небесному усердно возсылаем и вам, предстателем нашим, хвалу приносим, вопиюще:
Радуйтеся, земли Русския Богом дарованнии защитницы.
Радуйтеся, яко по всей стране Российстей память ваша празднуется.
Радуйтеся, посвященных вам храмов неусыпнии покровители.
Pадуйтеся, об Отечестве и народе нашем молитвенницы предивнии.
Радуйтеся, чудесы многими по кончине прославленнии.
Радуйтеся, в нуждах и бедах сущих скорое избавление.
Радуйтеся, болезней душевных и телесных целители.
Pадуйтеся, мира семейнаго блюстители.
Радуйтеся, изгнанных правды ради утешители.
Pадуйтеся, за нас, грешных, пред Богом споручницы.
Радуйтеся, вечную радость на Небеси обретшии.
Pадуйтеся, о всем мире христианстем молитвы Богу приносящии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 11
Пения похвальная приношаше земля Русская тебе, святая царевна Анастасие, и всей седмерице царственных страстотерпец от дней убиения вашего до прославления в сонме новомучеников и исповедников Российских, почитающи память страданий ваших. Темже и мы, в напастех и бедах к вам прибегающе и на ваше предстательство уповающе, едиными усты и единем сердцем непрестанно взываем Благодетелю Богу: Аллилуиа.

Икос 11
Светоподательныя светильники, светом любве Христовы и огнем чудес землю Русскую освещающия, зрим вас святии царственнии страстотерпцы, и сиянием вашея небесныя славы озаряеми, поем и прославляем вас песньми таковыми:
Радуйтеся, светильницы, любовию Божиею горящии.
Pадуйтеся, лучами благодати Божия осияннии.
Радуйтеся, сиянием небеснаго света озареннии.
Pадуйтеся, благоухания духовнаго преисполненнии.
Радуйтеся, пресветлаго собора святых земли нашея звезды сияющия.
Pадуйтеся, яко вами Свет Христов в стране Российстей умножается.
Радуйтеся, всех обидимых и неправедно гонимых заступницы.
Pадуйтеся, ко Господу моление людей российских приносящии.
Радуйтеся, столпи света, путь к Царствию Небесному нам указующии.
Pадуйтеся, предстательством своим у Господа благоустроение Отечеству вашему испрошающии.
Радуйтеся, светом невещественным души просвещающии.
Pадуйтеся, вся благая прошения наша исполняющии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 12
Благодать, данную вам от Господа видяще, стастотерпцы царственнии, молим вы, испросите у Христа Бога нашего стране Российстей мир и спасение; помозите всем живущим в ней людем, ихже возлюбили есте любовию жертвенною, обрести радость духовную, покой души, мужество и крепость во испытаниих; во святей вере, благочестии и чистоте нас сохраните, да со всеми вами воспоем Богу победную песнь: Аллилуиа.

Икос 12
Поюще дивное предстательство ваше к Богу, святии царствении страстотерпцы, царю Николае, царице Александро, царевичу Алексие, царевны Ольго, Татиано, Марие и Анастасие, величаем дивнаго во святых Своих Царя Небеснаго, ублажаем мученическую кончину вашу и почитаем вас, яко молитвенников не токмо за землю Русскую, но и о всех верных чадех Церкве Православныя. Веруем, яко дадеся вам благодать недужныя врачевати, обидимыя заступати, в вере истинней укрепляти, на путь правды наставляти всех любовию славящих вас сице:
Радуйтеся, Трисиянным Светом озареннии.
Pадуйтеся, яко зрите всегда Творца своего и Господа.
Радуйтеся, с Царицею Небесе и земли о мире молящиися.
Pадуйтеся, с Небесными Силами Бога прославляющии.
Радуйтеся, страдальческим подвигом вашим людей российских в вере укрепившии.
Pадуйтеся, заступницы наши усерднии.
Радуйтеся, страстотерпцы Христовы, диавола победившии.
Pадуйтеся, от злобы его и коварства верных избавляющии.
Радуйтеся, светильницы, души наша благодатию озаряющии.
Pадуйтеся, яко вами вся земля наша духовно возрадовася.
Радуйтеся, нетления цвети благоуханнии.
Pадуйтеся, чудес источницы неистощимии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 13

О предивнии в страданиих святии царственнии страстотерпцы, царю Николае и царице Александре с царственными чады вашими, скории помощницы всем с верою к вам прибегающым, приимите малое сие моление наше и приносимыя вам хвалы, и сохраните страну нашу Российскую, народ ея и вся грады и страны христианския от глада, губительства, труса, потопа, огня, меча, от нашествия иноплеменных и междоусобныя брани и от всякаго зла. Умолите Господа об оставлении нам грехов вольных и невольных, да избавльшеся от вечныя смерти молитвами вашими, радостно воспоем Богу: Аллилуиа.
Этот кондак читается трижды, затем 1 -й икос: «Ангелов Творец...» и 1-й кондак: «Избраннии и всехвалънии..."

Молитва святым царственным страстотерпцем императору Николаю II и его семье


О святый страстотерпче, царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве Православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова многострадальнаго, попусти ти поношения, скорби горькия, измену и предательство подданных, ближних отчуждение и в душевных муках земнаго царства оставление. Вся сия ради блага России, яко верный сын ея, претерпев и, яко истинный раб Христов, мученическую кончину прием, Небеснаго Царства достигл еси, идеже наслаждаешися вышния славы у Престола всех Царя, купно со святою супружницею твоею, царицею Александрою, и царственными чады Алексием, Ольгою, Татианою, Мариею и Анастасиею.
Ныне, имея дерзновение велие у Христа Царя, моли, да простит Господь грех богоотступничества народа нашего, и подаст грехов прощение, и на всякую добродетель наставит нас, да стяжем смирение, кротость и любовь и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно, и во веки веков. Аминь.

Тропарь благоверному императору Российскому, страстотерпцу, Николаю II и иже с ним убиенным
Тропарь, глас 5:
Царства земнаго лишение, узы и страдания многоразличныя, кротко претерпел еси, свидетельствовав о Христе, даже до смерти от богоборцев, страстотерпче великий Боговенчанный царю Николае, сего ради мученическим венцем на Небесех венча тя с царицею, и чады, и слуги твоими Христос Бог, Егоже моли помиловати страну Российскую и спасти души наша.

Тропарь, глас 4:
Днесь благовернии людие, светло почтим седмерицу честную царственных страстотерпец, Христову едину домашнюю церковь: Николая и Александру, Алексия, Ольгу, Татиану, Марию и Анастасию. Тии бо, уз и страданий многоразличных не убоявшеся, от богоборных смерть и поругание телес прияша и дерзновение ко Господу в молитве улучиша. Сего ради к ним с любовию возопиим: о святии страстотерпцы, гласу покаяния и стенанию народа нашего вонмите, землю Российскую в любви к Православию утвердите, от междоусобныя брани сохраните, мир мирови у Бога испросите и душам нашим велию милость.

Кондак, глас 3:
Мирликийскому предстателю, благоверный царю, подражатель показался еси, Христово бо Евангелие исполнив. Положил еси душу твою за люди твоя и спасл еси повинныя, паче же неповинныя от смерти, сих ради мученническою кровию освятился еси, яко великомученик Церкве Христовы.

Ин кондак, глас 6:
Надежда царя мученика с царицею, и чады, и слуги укрепи, и к Твоей любви окрыли, будущий им покой предвозвестивши, тех молитвами, Господи, помилуй нас.

Ин кондак, глас 8:

Избраннии Царем царствующих и Господем господствующих от рода царей Российских, благовернии мученицы, муки душевныя и смерть телесную за Христа приимшии и венцы небесными увенчавшиися, к вам, яко покровителем нашим милостивым, с любовию благодарне вопием: радуйтеся, царственнии страстотерпцы, за Русь Святую пред Богом усерднии молитвенницы.

Величание



Величаем тя, страстотерпче святый царю Николае, и чтим святую память твою, ты бо молиши за нас Христа Бога нашего.


Категория: АКАФИСТЫ | Добавил: jnp (28-01-12)
Просмотров: 1830 | Рейтинг: 4.5/2
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Поиск
Форма входа

ПСАЛТИРЬ ПОСЛУШАТЬ 20 КАФИЗМ
Copyright MyCorp © 2016
Locations of visitors to this page